خرافة أم بسيسي... قصة من التراث القصصي الليبي القديم

 خرافة أم بسيسي... قصة جميلة من التراث الليبي.
"قبل السرد أود التنبيه بأن الصورة المرفقة ليست حقيقية بل ولّدتها بالذكاء الصناعي".

اليوم أحبتنا في الله متابعي صفحة مدونة أمواج البحر سنبتعد قليلاً عن أجواء الصور وسنأخذكم في رحلة مع قصة من عبق الماضي الجميل وقد نشرناها في الموقع الأصلي للمدونة على الويب بتاريخ 18 يونيو 2014 م وقمنا بسردها كما حفظناها من ذاكرة أمهاتنا وجداتنا رحمة الله ورضوانه عليهن، ومن الجدير بالذكر أن خرافة أم بسيسي ليست حصرا على التراث الليبي فقط، فهي معروفة أيضا في التراث المصري والشامي والخليجي والمغاربي ولكن تختلف الروايات في بعض التفاصيل الصغيرة مع وحدة سياق القصة الأصلية ....
لن نطيل عليكم أكثر ولنترككم مع الخرافة .

خرافة أم بسيسي
مرة كان في فارة قالت لولدها عدي لأم بسيسي جيب لي منها الغربال، مشى الفوير لأم بسيسي وقال لها يا أم بسيسي تسلم عليك أمي وقالت لك عطيني الغربال، قالت له خش للكوجينة تلقاني مغطية بيه الحليب خوذه واصحى راك تشرب من الحليب، شوي خش الفوير للمطبخ وخذا الغربال لكن جا خاطره في الحليب مشى شرب منه، وبعدها وهو طالع قالت له أم بسيسي شكلك شربت من الحليب.
الفوير قاللها لا ماشربتش منه وحلف لها، مشت قالت له أهو الحليب باين على شناباتك يا كذاب توة بعد ما غطست شناباتك فيه مازال تبيني نشرب منه ؟
جا الفار يبي يهرب شوي مسكاته من ذيله شوي انقطع، قعد الفار يبكي مشت أم بسيسي قالت له تستاهل لأنك كذاب، مشى قاللها يا أم بسيسي عطيني ذويلي نلعب بيه نهار العيد ( لأن العيد كان قريب ) مشت قالت له مانيش مرجعته لك لين تمشي تجيب لي حليب غيره من عند العنز
مشى الفار للعنز قال لها يا عنيزة عطيني حليب نعطيه لأم بسيسي وأم بسيسي تعطيني ذويلي نلعب بيه نهار العيد .
مشت العنز قالت لي عدي جيبلي نبق من السدرة قبل، مشى للسدرة قاللها يا سدرة عطيني نبق والنبق نعطيه للعنز والعنز تعطيني حليب والحليب نعطيه لأم بسيسي وأم بسيسي تعطيني ذويلي نلعب بيه نهار العيد .
مشت السدرة قالت له عدي جيب لي سيل من الوادي قبل، مشى الفار للوادي وقال له يا وادي عطيني سيل والسيل نعطيه للسدرة والسدرة تعطيني نبق والنبق نعطيه للعنز والعنز تعطيني حليب والحليب نعطيه لأم بسيسي وأم بسيسي تعطيني ذويلي نلعب بيه نهار العيد .

مشى الوادي قال له عدي جيب لي زغرادات من النجع قبل، مشى الفار للنجع وقال لهم يا نجع عطوني زغرادات والزغرادات نعطيهم للوادي والوادي يعطيني سيل والسيل نعطيه للسدرة والسدرة تعطيني نبق والنبق نعطيه للعنز والعنز تعطيني حليب والحليب نعطيه لأم بسيسي وأم بسيسي تعطيني ذويلي نلعب بيه نهار العيد .
مشوا النجع قالوا له عدي جيبلنا حويلي من راعي الغنم قبل ( حويلي يعني شاة صغيرة ) شوي مشى للراعي وقال له يا راعي عطيني حويلي والحويلي نعطيه للنجع والنجع يعطوني زغرادات والزغرادات نعطيهم للوادي والوادي يعطيني سيل والسيل نعطيه للسدرة و السدرة تعطيني نبق والنبق نعطيه للعنز والعنز تعطيني حليب والحليب نعطيه لأم بسيسي وأم بسيسي تعطيني ذويلي نلعب بيه نهار العيد .
شوي الراعي قال له عدي جيب لي حطب من الخروبة قبل، مشى للخروبة وقال لها يا خروبة عطيني حطب والحطب نعطيه للراعي والراعي يعطيني حويلي والحويلي نعطيه للنجع والنجع يعطوني زغرادات والزغرادات نعطيهم للوادي والوادي يعطيني سيل والسيل نعطيه للسدرة والسدرة تعطيني نبق والنبق نعطيه للعنز والعنز تعطيني حليب والحليب نعطيه لأم بسيسي وأم بسيسي تعطيني ذويلي نلعب بيه نهار العيد .
شوي الخروبة قالت له عدي جيب لي جريو من الكلبة قبل ( تصغير جرو ) شوي مشى الفار للكلبة وقال لها يا كلبة عطيني جريو والجريو نعطيه للخروبة والخروبة تعطيني حطب والحطب نعطيه للراعي والراعي يعطيني حويلي والحويلي نعطيه للنجع والنجع يعطيني زغرادات والزغرادات نعطيهم للوادي والوادي يعطيني سيل والسيل نعطيه للسدرة والسدرة تعطيني نبق والنبق نعطيه للعنز والعنز تعطيني حليب والحليب نعطيه لأم بسيسي وأم بسيسي تعطيني ذويلي نلعب بيه نهار العيد .
شوي الكلبة قالت له عدي جيب لي فلو نلعب معاه من الفرس قبل ( الفلو المهر أي صغير الفرس )
مشى للفرس وقال لها يا فرس عطيني فلو والفلو نعطيه للكلبة و الكلبة تعطيني جريو و الجريو نعطي للخروبة والخروبة تعطيني حطب والحطب نعطيه للراعي والراعي يعطيني حويلي والحويلي نعطيه للنجع والنجع يعطيني زغرادات والزغرادات نعطيهم للوادي والوادي يعطيني سيل والسيل نعطيه للسدرة والسدرة تعطيني نبق والنبق نعطيه للعنز والعنز تعطيني حليب والحليب نعطيه لأم بسيسي وأم بسيسي تعطيني ذويلي نلعب بيه نهار العيد .
شوي الفرس قالت له عدي جيب لي شعير من الحصادة قبل، شوي مشى للحصادة وقال لهم يا حصادة عطوني شعير والشعير نعطيه للفرس والفرس تعطيني فلو والفلو نعطيه للكلبة والكلبة تعطيني جريو والجريو نعطيه للخروبة والخروبة تعطيني حطب والحطب نعطيه للراعي والراعي يعطيني حويلي والحويلي نعطيه للنجع والنجع يعطيني زغرادات والزغرادات نعطيهم للوادي والوادي يعطيني سيل والسيل نعطيه للسدرة والسدرة تعطيني نبق والنبق نعطيه للعنز والعنز تعطيني حليب والحليب نعطيه لأم بسيسي وأم بسيسي تعطيني ذويلي نلعب بيه نهار العيد .
شوي الحصادة قالوا له عدي سن لنا المناجل عند الحداد قبل، شوي مشى للحداد وقال له يا حداد سن لنا المناجل والمناجل نعطيهم للحصادة والحصادة يعطوني شعير والشعير نعطيه للفرس والفرس تعطيني فلو والفلو نعطيه للكلبة والكلبة تعطيني جريو والجريو نعطيه للخروبة والخروبة تعطيني حطب والحطب نعطيه للراعي والراعي يعطيني حويلي والحويلي نعطيه للنجع والنجع يعطيني زغرادات والزغرادات نعطيهم للوادي والوادي يعطيني سيل والسيل نعطيه للسدرة والسدرة تعطيني نبق والنبق نعطيه للعنز والعنز تعطيني حليب والحليب نعطيه لأم بسيسي وأم بسيسي تعطيني ذويلي نلعب بيه نهار العيد .
شوي الحداد قال له عدي جيب لي نار من البيت قبل شوي مشى للبيت وقال لهم يا هل البيت عطوني نار والنار نعطيها للحداد والحداد يسن لنا المناجل والمناجل نعطيهم للحصادة والحصادة يعطوني شعير و الشعير نعطيه للفرس والفرس تعطيني فلو والفلو نعطيه للكلبة والكلبة تعطيني جريو والجريو نعطيه للخروبة والخروبة تعطيني حطب والحطب نعطيه للراعي والراعي يعطيني حويلي والحويلي نعطيه للنجع والنجع يعطيني زغرادات والزغرادات نعطيهم للوادي والوادي يعطيني سيل والسيل نعطيه للسدرة والسدرة تعطيني نبق والنبق نعطيه للعنز والعنز تعطيني حليب والحليب نعطيه لأم بسيسي وأم بسيسي تعطيني ذويلي نلعب بيه نهار العيد .
شوي أهل البيت قالوا عطوه نار خلوه يفرح نهار العيد بذويله ..
المهم هل البيت عطوه قبس من النار وعطاها للحداد والحداد سن له المناجل والمناجل عطاهم للحصادة والحصادة حصدوله الشعير والشعير عطاه للفرس والفرس عطاته فلو والفلو عطاه للكلبة والكلبة عطاته جريو والجريو عطاه للخروبة والخروبة عطاته حطب والحطب عطاه للراعي والراعي عطاه حويلي والحويلي عطاه للنجع والنجع عطوه زغرادات والزغرادات عطاهم للوادي والوادي عطاه السيل والسيل شاله للسدرة والسدرة عطاته نبق والنبق عطاه للعنز والعنز عطاته حليب.
شوي فرح بالحليب وعدا يجري لأم بسيسي وعطاها الحليب شوي رجّعت له ذيله لكن لقاه عفّن ومعش ينفع وقعد يبكي من غير ذويل نهار العيد لأنه
كان كذاب وديما جزاء الكذب مش كويس ..
وبعدين طلع يبي يلعب مع الجيران شوي تموا يضحكوا عليه ويقولوله يا أبتر يا أبتر ( أي يا مقطوع الذيل ) رجع لحوشه يبكي شافاته أمه قالت له ليش تبكي في نهار العيد قال لها عيال الجيران ماخلونيش نلعب معاهم وقالولي يا أبتر .
أمه قالت له ندبر عليك دبارة توة اديرها ويخلوك تلعب معاهم
طلع الفوير لجيرانه مرة اخرى و قال لهم عندي لعبة حلوة نبيكم تلعبوها معاي قالوله كيف نديروا ؟
قال لهم تعالوا قربوا كلكم ونربط ذيولكم نوريكم اللعبة
قربوا منه كل الفيران وربطلهم ذيولهم مع بعضهم وبعدين قعد يعيط يقول لهم اهربوا جاكم القطوس جاكم القطوس تموا الفيران يحاولوا يهربوا وانقطعت ذيولهم كلهم
و الفار قعد يضحك وقال لهم مش كنتوا تعايروا فيا وتقولولي أبتر؟ اهو توا كلكم تميتوا مبتورين كيفي
تحشموا الفيران كلهم وسكتوا وقالوله خلاص كلنا توة كيف بعضنا و يا نلعبوا مع بعضنا

و نتهت خرافة أم بسيسي الجميلة التي صارت تضرب مثلا لأي امر يطول ويطول، فيقال "أطول من خرافة أم بسيسي" وقد توارثناها عن أمهاتنا وجداتنا المباركات، وأتمنى أن تكون اعجبتكم

خرافة نقارش ... قصة من التراث القصصي الليبي القديم

·

أحبتي في الله...
ضمن سلسلة "خراريف عزاينا"، لتعريف أجيالنا الجديدة بتراثنا القصصي الجميل، الي سمعناه من أمهاتنا وجداتنا الله يرحمهم، وبعد ما حكيت لكم الأيام الي فاتت خرافة أم بسيسي، جايبلكم اليوم خرافة نقارش.
و خرافة نقارش زيها زي باقي خراريف ناسنا الاولى _الله يرحمهم_ تعلم الأطفال القيم والمثل العليا في إطار قصصي خيالي تشويقي، والقصة قد تختلف في بعض تفاصيلها من منطقة إلى أخرى لكن تبقى الحبكة الأساسية وحدة، وبدون إطالة، نخليكم مع الخرافة:

خرافة نقارش
كان يا ما كان، في قديم الزمان، في بنية صغيرة حلوة و مؤدبة ولسانها أحلى من الشهد، اسمها نقارش.

نقارش كانت يتيمة، أمها ميتة وبوها مسافر، وقاعدة مع مرات بوها، ومرات بوها كانت قاسية، ما تعطي فيها تاكل إلا الخبزة اليابسة، وتخدّم فيها ليل نهار، وما تلبس فيها إلا الدبش القديم المرقع، ومرات بوها كان عندها بنت مدلعتها وتفضّل فيها على نقارش، وتوكل فيها أحسن أكل وتلبس فيها أحسن لبس وماتخليهش ادير شي.

يوم من الايام، نقارش عطتها مرات بوها صوف وقالت لها: "امشي اغسليه في العين، وكان ما قعدش أبيض زي الثلج ما ترجعيش".

نقارش خذت الصوف ومشت للعين لقت اميتها ضعيفة، وقعدت تغسل، تغسل، تغسل والصوف ما يبيش ينظف مشت قعمزت وقعدت تبكي.

وهي تبكي، فاتت عليها عزوز، قالت لها: "خيرك يا نقارش تبكي؟"
قالت لها: "يا عمتي الحاجة مرات بوي قالتلي ما نرجعش لين الصوف يولي أبيض، والعين اميتها ضعيفة".
قالت لها العزوز: "قولي يا عين يا عويّنة، بيّضيلي هالصويفة، واجبري خاطر نقارش المسكينة".

وفعلا العين جرت، والصوف قعد ابيض يلمع، فرحت نقارش وجت بتروح، مشت قالت لها العزوز: "يا بنيتي، انتي بنية طيبة، بنوصيك وصية، لما تمشي في الطريق نوصيك بثلاث حاجات، اسقي العطشانة، ولا تسكري عين المية، واكرمي الخبزة الطايحة، ووين توصلي لحوش الغولة، قولي السلام قبل الكلام".

شكرتها نقارش ومشت تبي تروح، شوي لقت شجرة سدر يابسة وعطشانة تفكرت الوصية وعرفت أن العزوز تقصد السدرة، مشت سقتها، ولقت عين امية مسكرة نظفتها وخلتها تجري، ولقت خبزة على الارض رفعتها وحطتها فوق الساس.
قعدت نقارش تمشي لكن ضلت طريقها للحوش، بعدين شافت حوش قالت نسأل اهل الحوش عن الطريق، خبطت الباب وقالت بصوت عالي: "السلام عليكم يا هل البيت"

انفتح الباب، طلعت منه غولة، وجهها وجه مراة وشعرها نازل للوطا وعيونها تقدح تخوف، قالت لها: "لوكان سلامك ما سبق كلامك، ما ينسمع غير طقيق عظامك يا نقارش، خشي".

خشت نقارش وهي خايفة، لقت الحوش معبي ذهب وفضة. الغولة قالت لها: "اقعدي مشطيلي شعري".

قعدت نقارش تمشط وخايفة مش قادرة تهرب، والغولة شعرها ملبد في بعضه تقول ليفة، وهي تمشطلها تلقى في القمل كبر حبة الزيتون، شدت عزمها وما بتش تبين أنها تشعر بالقرف، وقعدت تقول: "يا سلام، يا محلى شعرك الناعم يا عمتي الغولة"

الغولة عجبها الكلام ورقدت.
نقارش قعدت هادية لين تأكدت أن الغولة خذاها النوم، بعدها ناضت تسلّل من غير ما ادير حس، لمت صوفها، وخذت صندوق ذهب وجت تبي تهرب، سمعت الغولة تقول وهي راقدة: "يا ساس يا بو السيسان، كيف تنوض نقارش امسكها".

نقارش تفكرت وصية العزوز، مشت للساس اللي حطت عليه الخبزة، قالت له: "يا ساس كول الخبزة وتفكر المعروف".

ومشت للعين قالت لها: "يا عين اجري وتفكري المعروف".
ومشت للسدرة وقالتلها: "يا سدرة اشربي وتفكري المعروف".

بعدها هربت نقارش وقعدت تجري، ناضت الغولة تبي تجري وراها لقت نقارش سابقتها بمسافة، ووين وصلت للساس الغولة قالت له امسكها، قال لها: "كيف نمسكها وهي وكلتني وانا جيعان؟".
وصلت للعين، قالت لها امسكيها، قالت لها: "كيف نمسكها وهي جرتني وانا كنت مسدودة؟"
وبعدين وصلت لشجرة السدر، قالت لها يا سدرة امسكيها، قالت لها: "كيف نمسكها وهي سقتني وانا عطشانة".

رجعت الغولة لحوشها خايبة، ونقارش روحت لحوشها وعطت مرات بوها الصوف الابيض.
مرات بوها شافت صندوق الذهب قالتلها من وين جبتي الذهب؟ قالتلها من حوش الغولة، لكن توة نقسمه معاك
مرات بوها طمعت وقالتلها لا توة نبعث بنتي تجيب صندوق ذهب أكبر منه، وفعلا بعثت بنتها تبيها ادير زي نقارش، لكن بنتها قطعت عرف من السدرة، وشافت العين تجري مشت سدتها بصخرة وشافت الخبزة عالأرض عفست عليها، ووين وصلت لحوش الغولة خبطت عالباب، فتحتلها الغولة لكن البنية ما سلمتش على الغولة، وقالت لها: "يا غولة خاطري نشوف حوشك شنو شكله". الغولة قالتلها خشي ومشطي لي شعري قبل، البنية مسكت المشط ولما بدت تمشط قالت يا غولة يا غويليلة هذا شعرك ولا ليفة؟ الغولة مابتش تقول حاجة، وبعدين شافت قملة كبيرة كيف الزيتونة في شعر الغولة خافت وعيطت وجت تبي هرب، وهي هاربة شافت الذهب ومن الطمع خذت صندوق كبير، ومن ثقله ماقدرتش تشيله وقعدت تكرّ فيه وراها لكن مش قادرة تجري، ومن الطمع ماتبيش تخليه، والغولة تجري في جرتها لين مسكتها عند الباب وكلتها.
مرات بوها عرفت الي صار وقعدت تبكي ليل نهار.
اما نقارش، سمع بيها ولد السلطان وأنها الوحيدة الي قدرت تغلب الغولة، مشى قال هذي الي تليق بالسلطان، وتزوجها وعاشوا في هناء وسعادة.