كثرة الحلف

 ليبي تلاقى مع صاحبه:
_ اهلا يا احميدة، تي بالله كيف حالك؟
(لازم من الحلف باش يضمن إجابة صادقة ويطمن على حاله)
_ والله الحمد لله يا عليوة، وانت بالله كيف حالك؟
(احميدة حتى هو لازم يحلف انه كويس علشان عليوة يصدق ان حاله باهي، ويزيد معاها أنه يحلف له انه حتى هو يخبره بحاله بكل صدق)
_ بالله عليك شن صار في التفتوفة الي متسلفها مني؟
(لازم من حلفة للاطمئنان عن مصير التفتوفة)
_ والله شن بنقولك توة، غير تنزل السيولة وحاضر.
(حلفة مضادة لتطمينه ان تفتوفته في الحفظ والصون)
_ منور  يا احميدة والله، هيا منعطلكش غير بالله معاد تغيب يا راجل.
(الحلفة الأولى لتأكيد الود والثانية لتأكيد التأكيد الأول)
يمشي عليوة ويخش لدكان الخضرة....
_ بالله اوزنلنا كيلو طماطم وكيلو فلفل غير نبيه حار يمحمط.
(حلفة لتنبيه البياع انه ينتبه للوزن وما يفكرش يغشه ويوازيله فلفل محماطي)
_ والله فلفل نار متاع شرمولة حقانية وكيف واصل.
(حلفة لتأكيد أن الفلفل محماطي يمشي حتى مع المبكبكة.
_ ترة شدلي البورزة بالله عليك نحطلك خضيرتك.
(حلفة مالقيتلهاش سبب الحق )
_ كم حسابك بالله؟
(حلفة لازم منها لضمان الحصول على السعر الحقيقي)
_ عشرة ونص والله لكن هات عشرة وخلاص.
(حلفة مضادة لإشعار عليوة بتأنيب الضمير على حلفته السابقة)
_ يا ودي والله الا زعيم ربي يحفظك.
(حلفة مضادة لتأكيد حسن النية ووجود الثقة)
يطلع عليوة من الدكان ويكمل باقي يومه هو وباقي الناس في الحلف بسبب وبلا سبب في كل جملة، ولو كان سبب كثرة الحلف في مجتمعنا هو قلة الصدق فهي مصيبة، وإن كان السبب هو هوان اسم الله عز وجل على الناس فالمصيبة أكبر.

قال المولى جل وعلا:
  (ولا تجعلوا الله عرضة لأيمانكم ... ) [البقرة: 224]
ويقول: (واحفظوا أيمانكم) [المائدة: 89]
ووصف الله عز وجل كثرة الحلف من ضمن عدة أوصاف مذمومة حيث قال تعالى في سورة القلم: (ولا تطع كل حلاف مهين هماز مشاء بنميم مناع للخير معتد أثيم عتل بعد ذلك زنيم)